✿✿✿✿✿✿✿✿✿✿✿✿✿✿
(၁) တန်ဖိုးထားထိုက်ဆုံးစကားတစ်ခွန်း
"နင့်ကိုငါချစ်တယ်"
•••••••••••••••••••••••••••••••••••••••••••••••
ဒီစကားတစ်ခွန်းကို သင်ကြားလိုက်ရပြီဆိုရင်
သင်ဟာတခြားသူရဲ့ချစ်ခြင်းကို ခံလိုက်ရတာဖြစ်ပါတယ်။
လောကမှာ အချစ်ခံရထက်တာ ပိုချိုမြိန်၊ ပျိုပျော်ရွှင်တဲ့အရာ
ရှိနိုင်ဦးမလား? တကယ်လို့ ဒီလိုစကားတစ်ခွန်းကို
သင်လည်း ပြောလိုက်ပြီဆိုရင် စိတ်ကူးထဲကအဖော်ကို
သင်ရှာတွေ့ပြီဖြစ်ကြောင်း ပြနေပါတယ်။
.
(၂) နှစ်သိမ့်ထိုက်ဆုံးစကားတစ်ခွန်း "အခုပဲလာခဲ့မယ်"
•••••••••••••••••••••••••••••••••••••••••••••••••••••••••••
လူတိုင်းမှာ အကူအညီလိုတဲ့အချိန်တွေ ရှိပါတယ်။
တစ်ပတ်လောက် ပင်ပင်ပန်းပန်းအလုပ်လုပ်ပြီး
နားရက်မှာ သင်အနားယူနေတုန်း ရုတ်တရက်
အိမ်ကရေစက်ခေါင်းပျက်သွားတယ်။
ရေပိုက်ပြင်သမားကို သင်ချက်ချင်းဖုန်းဆက်တော့ သူက
"ကျွန်တော် အခုပဲလာခဲ့မယ်"လို့ ပြန်ဖြေတဲ့အချိန်
သင့်စိတ်သက်သာရာရသွားတယ်။
သင်ကားမောင်းနေတုန်း လမ်းတစ်နေရာမှာ
ရုတ်တရက် ကားပျက်သွားတယ်။ နောက်ကားတွေက
သင့်ကားနောက်တန်းစီပြီး ဟွန်း အဆက်မပြတ်
တီးနေတယ်။ သင်စိတ်ပူပန်လှုပ်ရှားပြီး
သူငယ်ချင်းတစ်ယောက်ကို သင်ဖုန်းဆက်တယ်။
သူငယ်ချင်းရဲ့ "ငါအခုပဲလာခဲ့မယ်"ဆိုတဲ့စကားက
သင့်ရင်ထဲက အစိုင်အခဲကို ပြေလျော့သွားစေပါတယ်။
.
(၃) လူကိုယုံကြည်မှုတိုးစေဆုံး စကားတစ်ခွန်း
"မင်းလုပ်နိုင်တယ်ဆိုတာ ငါယုံတယ်"
•••••••••••••••••••••••••••••••••••••••••••••••••••••••
ဆရာတစ်ဦးက ကျွန်တော့်ကိုပြောပြဖူးတယ်။
ကျောင်းသားတွေကို သူအချက်ကျကျ ကိုင်တွယ်နည်းက
ကျောင်းသားတွေနဲ့ အမြဲတမ်း နှစ်ကိုယ်ကြား
ဆွေးနွေးတာပဲဖြစ်တယ်။ အမှတ်ကောင်းတဲ့
ကျောင်းသားဖြစ်ဖြစ်၊ အမှတ်မကောင်းတဲ့
ကျောင်းသားဖြစ်ဖြစ် ဆရာအမြဲပြောလေ့ရှိတာက
"မင်းလုပ်နိုင်တယ်ဆိုတာ ဆရာယုံတယ်"ဆိုတာပဲဖြစ်တယ်။
ဒါကြောင့် သူသင်ဖူးတဲ့ ကျောင်းသားတိုင်းလိုလိုဟာ
မိမိကိုယ်ကိုယ်ယုံကြည်စိတ် အပြည့်ရှိသူတွေဖြစ်တယ်။
"လုပ်နိုင်သူ"တွေက "ပိုလုပ်နိုင်"ခဲ့ကြပြီး "မလုပ်နိုင်သူ"
တွေလည်း "လုပ်နိုင်"ခဲ့ကြတယ်။
ကျောင်းသားတွေမှ မဟုတ်ပါဘူး။ လူကြီးတွေလည်း
အဲဒီလိုပဲဖြစ်တယ်။ လူတစ်ယောက်ဟာ အခက်အခဲကြုံချိန်၊
အမှားလုပ်မိချိန်၊ ဒါမှမဟုတ် တွေဝေဆုံးဖြတ်ရခက်နေချိန်မှာ
သူ့ရဲ့လမ်းညွှန်သူ ဒါမှမဟုတ် သူ့သူငယ်ချင်းက
"မင်းကို ငါယုံတယ်"၊ "မင်းလုပ်နိုင်တယ်ဆိုတာ
ငါသိတယ်"ဆိုတဲ့စကားတစ်ခွန်း ပြောပေးရုံနဲ့
သူ့ကိုသတ္တိအင်အားတွေ ပြန်လည်ပြည့်တင်းစေပါတယ်။
.
(၄) အတင်းအဖျင်းကို ပထုတ်နိုင်ဆုံးစကားတစ်ခွန်း
"မင်းလမ်းမင်းလျှောက် သူတို့ပြောချင်ရာ ပြောပါစေ"
•••••••••••••••••••••••••••••••••••••••••••••••••••••••••••
ကျွန်တော့်ဖခင် ကျွန်တော်ကိုစကားတစ်ခွန်းပြောဖူးတယ်။
"တကယ်လို့ တခြားလူ မရယူနိုင်တဲ့အရာကို
သားရယူချင်ရင် သူတို့မပေးဆပ်နိုင်တဲ့အရာကို
သားပေးဆပ်ရလိမ့်မယ်။ တကယ်လို့
တခြားလူအနားယူချိန် သားလည်းအနားယူမယ်၊
တခြားလူအလုပ်လုပ်ချိန်မှ သားအလုပ်လုပ်မယ်။
တခြားလူ ဘဝကို ဘယ်လိုဖြတ်သန်းရင်
သားလည်းသူတို့အတိုင်း ဖြတ်သန်းမယ်ဆိုရင်
သူတို့ရတာပဲ သားရလိမ့်မယ်"
ဘဝမှာ အောင်မြင်သူတွေဟာ တခြားလူထက်
ဝေးဝေးကြည့်တယ်၊ တခြားလူထက် နက်နက်တွေးတယ်၊
တခြားလူထက် ပိုအလုပ်လုပ်တယ်။ အဲဒီလိုပဲ
အတင်းအဖျင်း၊ ကောလဟာလတွေလည်း
သူတို့နဲ့အဖော်ပြုတာ ခံရတယ်။ ဒါကြောင့်
တခြားလူဆီကနေ မတူတဲ့အသံကိုကြားရတဲ့အခါ
ကိုယ့်ရဲ့ပြုမူပြောဆိုမှုကို ဆန်းစစ်ရသလို၊ ကိုယ့်ရဲ့
ဆုံးဖြတ်ချက်ကိုလည်း ပိုခိုင်မြဲအောင်လုပ်ရပါတယ်။
လူရွန်းပြောသလိုပါပဲ..."သူတို့ပြောချင်ရာ ပြောပါစေ...
ကဲ့ရဲ့ဝေဖန် အတင်းအဖျင်းပြောသူတွေရဲ့
ချီးကျူးစကားက ကိုယ်အောင်မြင်မှုရပြီးချိန်မှ
ကြားရတတ်တဲ့ စကားဖြစ်တယ်"။
.
(၅) ပြောရအခက်ဆုံးနဲ့ သဘောထားကွဲလွဲမှုကို
အဖြေရှင်းနိုင်ဆုံး စကားတစ်ခွန်း "မင်းမှန်တာလည်း
ဖြစ်နိုင်ပါတယ်"
•••••••••••••••••••••••••••••••••••••••••••••••••••••••••••
ဒီလိုစကားတစ်ခွန်းက တိုက်ပွဲထဲကလူတစ်ယောက်ကို
လက်နက်ချခိုင်းသလိုပါပဲ.. ငြင်းခုန်ရန်ဖြစ်ပွဲမှာ
အမှားကိုဝန်ခံတာဟာ အရမ်းမျက်နှာသာမဲ့စေတဲ့
လုပ်ရပ်ပါ။ ဒါပေမယ့် အခြေအနေ တော်တော်များများမှာ
ဒီလိုစကားတစ်ခွန်းက ဒေါသကြောင့်
တောက်လောက်မယ့်မီးကို အချိန်မီ ငြိမ်းစေနိုင်သလို၊ ပွက်လောရိုက်နေတဲ့ဦးနှောက်ကို ချုပ်ငြိမ်းစေနိုင်သလို၊
ချိန်ရွယ်ထားတဲ့ လက်သီးကို ဖြည်လျော့စေနိုင်သလို၊
ကွဲပြားတဲ့အတွေးအမြင်ကို တစ်နေရာတည်းမှာ
စုဆုံစေနိုင်ပါတယ်။ ထိခိုက်ဒဏ်ရာနဲ့ ဆုံးရှုံးမှုကို
ကာကွယ်တားဆီးနိုင်သလို အဖွဲ့ရဲ့စည်းလုံးခြင်းနဲ့
တည်ငြိမ်ခြင်းကိုလည်း ထိန်းချုပ်နိုင်ပါတယ်။
ဒီလိုစကားတစ်ခွန်းက မိသားစုအငြင်းပွားမှုမှာ
ပိုအသုံးဝင်ပါတယ်။ လင်မယားကြားမှာ
ကိစ္စသေးသေးမွှားမွှားနဲ့ စကားများရန်ဖြစ်တဲ့အခါ
တကယ်လို့ တစ်ယောက်ယောက်က ဒီစကားကို
အရင်ဆုံးပြောလိုက်ရင် သဘောထားကွဲလွဲမှုကို
ရပ်တန့်စေနိုင်ပါတယ်။ နှစ်ဦးနှစ်ဖက် သွေးအေးသွားမှ
ပြဿနာရဲ့အရင်းအမြစ်ကိုရှာပြီး ဖြေရှင်းနိုင်ပါတယ်။
အချင်းချင်းချစ်ကြိုက်လို့ အတူတကွပေါင်းဖက်ကြပြီးမှ
ပြဿနာအသေးအမွှားနဲ့ ဘာကြောင့် နှစ်ဦးနှစ်ဖက်
ဒဏ်ရာရထိခိုက်အောင် ပြောဆိုငြင်းခုန်ကြမလဲ?
"မင်းမှန်တာလည်း ဖြစ်နိုင်ပါတယ်" ဆိုတဲ့စကားတစ်ခွန်းက
ဘာမှကို မဆုံးရှုံးစေနိုင်ပါဘူး။
━━━━━━━━━━━━━━━━━━━━
crd ✍️
